ডিজিটেল ডেস্ক, ANEWS24X7: প্ৰধানমন্ত্ৰী নৰেন্দ্ৰ মোদীয়ে অশান্তিপূৰ্ণ ৰাজ্য মণিপুৰ ভ্ৰমণ কৰি নিজেই পৰিস্থিতি চাব লাগে। বুধবাৰে বিয়লি ৰাষ্ট্ৰপতি দ্ৰৌপদী মুৰ্মুক সাক্ষাৎ কৰি বিৰোধী মিত্ৰজোঁট “ভাৰত”ৰ ৩১ জন প্ৰতিনিধিয়ে এই দাবী উত্থাপন কৰে। বিৰোধী দলৰ সাংসদসকলে মণিপুৰৰ শেহতীয়া পৰিস্থিতিৰ কথা উল্লেখ কৰি ৰাষ্ট্ৰপতিৰ হাতত এখন স্মাৰক পত্ৰও প্ৰদান কৰে।
প্ৰতিনিধি দলটোত ‘ভাৰত’ মিত্ৰজোঁটৰ প্ৰায় সকলো অংশগ্ৰহণকাৰী দলৰ শীৰ্ষস্থানীয় নেতাসকল আছিল। শেহতীয়াকৈ মণিপুৰ ভ্ৰমণ কৰি তাত থকা পৰিস্থিতিৰ সাক্ষী হোৱা ২১জন বিৰোধী সাংসদও এই প্ৰতিনিধি দলটোত আছিল। ৰাষ্ট্ৰপতিৰ সন্মুখত তেওঁলোকৰ অভিজ্ঞতা ব্যক্ত কৰে। তৃণমূল ৰাজ্যসভাৰ সাংসদ সুশমিতা দেৱে মণিপুৰৰ দুগৰাকী মহিলাক ৰাজ্যসভালৈ মনোনীত কৰিবলৈ ৰাষ্ট্ৰপতিগৰাকীক অনুৰোধ জনায়। তেওঁ ৰাষ্ট্ৰপতিৰ আগত কয় যে মণিপুৰত মহিলাৰ ওপৰত চলি থকা অত্যাচাৰৰ পোহৰত দুয়োটা সম্প্ৰদায়ৰ দুগৰাকী মহিলাক ৰাজ্যসভালৈ আনিব লাগে।
ৰাষ্ট্ৰপতিগৰাকীক সাক্ষাৎ কৰাৰ পিছত কংগ্ৰেছৰ সভাপতি মল্লিকাৰ্জুন খাৰ্গে সংবাদ প্ৰতিষ্ঠান এএনআইক কয়, ‘মণিপুৰৰ পৰিস্থিতিৰ বিষয়ে আমি ৰাষ্ট্ৰপতিক অৱগত কৰিছো। সেই ৰাজ্যত কেনেকৈ নিৰ্যাতন চলি আছে সেই কথাও কৈছো। কিন্তু আমাৰ মূল দাবী যে সেই ৰাজ্যত শান্তি ঘূৰাই আনিবলৈ প্ৰধানমন্ত্ৰী মণিপুৰলৈ যাব লাগিব। এই বিষয়ত ৰাষ্ট্ৰপতি হস্তক্ষেপ কৰক।” বুধবাৰৰ প্ৰতিনিধি দলত এন চি পিৰ নেতা শৰদ পাৱাৰ, তৃণমূলৰ সুদীপ বেনাৰ্জী আৰু ডেৰেক অ’ব্ৰাইন, এন চিৰ ফাৰুক আব্দুল্লাকে ধৰি আন বহুকেইজন সদস্য আছিল।
