ডিজিটেল ডেস্ক, ANEWS24X7: আজি চীন সীমান্তৰ অৰুণাচল প্ৰদেশ গাওঁ ভ্ৰমণ কৰিব অমিত শ্বাহে । গৃহমন্ত্ৰী হিচাপে উত্তৰ-পূবৰ ৰাজ্যখনলৈ প্ৰথমবাৰ ভ্ৰমণ কৰি অমিত শ্বাহে সোমবাৰে কিবিথুত ‘সোণালী জয়ন্তী সীমান্ত আলোকসজ্জা কাৰ্যসূচী’ৰ অধীনত নিৰ্মাণ কৰা নটা মাইক্ৰ’ হাইডেল প্ৰকল্প উদ্বোধন কৰিব।
ইপিনে কেন্দ্ৰীয় গৃহমন্ত্ৰীগৰাকীয়ে সোমবাৰৰ পৰা অৰুণাচল প্ৰদেশলৈ দুদিনীয়া ভ্ৰমণকালত ভাৰত-চীন সীমান্তৰ কিবিথু নামৰ এখন গাঁৱত ‘ভাইব্ৰেণ্ট ভিলেজ প্ৰগ্ৰাম’ (ভিভিপি) আৰম্ভ কৰাৰ কথা আছে বুলি বিষয়াসকলে কয়। তেওঁ লিকাবালি (অৰুণাচল প্ৰদেশ), চাপ্ৰা (বিহাৰ), নুৰানাদ (কেৰালা) আৰু বিশাখাপত্তনম (অন্ধ্ৰ প্ৰদেশ)ত আন্তঃগাঁথনি বৃদ্ধিৰ বাবে ভাৰত-তিব্বত সীমান্ত আৰক্ষী (আইটিবিপি) প্ৰকল্পও উদ্বোধন কৰিব।
গৃহমন্ত্ৰী গৰাকীয়ে অৰুণাচল প্ৰদেশৰ আনজাও জিলাৰ কিবিথুত আইটিবিপিৰ কৰ্মচাৰীৰ সৈতে বাৰ্তালাপ কৰাৰ কথা আছে লগতে মঙলবাৰে নামতি পথাৰ পৰিদৰ্শন কৰিব আৰু ৱালং যুদ্ধ স্মাৰকত শ্ৰদ্ধাঞ্জলি জ্ঞাপন কৰিব।
