শনিবাৰে ৰাজ্যৰ কেইবাখনো জিলাত বিজুলী-ঢেৰেকনি-বজ্ৰপাতসহ বৰষুণৰ সম্ভাৱনা আছে বুলি আগজাননী প্ৰকাশ কৰিছে বৰঝাৰস্থিত আঞ্চলিক বতৰ বিজ্ঞান কেন্দ্ৰই। বতৰ বিজ্ঞান বিভাগে জনোৱা মতে, শনিবাতে নিশালৈও বৰষুণৰ লগতে বিজুলি-ঢেৰেকনি আৰু বতাহৰ প্ৰভাৱো দেখা যাব পাৰে। এই পৰিস্থিতিৰ বাবে সংশ্লিষ্ট জিলাসমূহত হালধীয়া সতৰ্কতা জাৰি কৰা হৈছে। এই সতৰ্কতাৰ অৰ্থ হৈছে সাধাৰণ লোকসকলে সাৱধানতা অৱলম্বন কৰাৰ প্ৰয়োজন আছে, যদিও বৰ্তমানলৈ কোনো গুৰুতৰ বিপদৰ আশংকা প্ৰকাশ কৰা হোৱা নাই।
বতৰ বিজ্ঞান কেন্দ্ৰৰ আগজাননী অনুসৰি, বৰষুণৰ পৰিমাণ সাধাৰণ হোৱাৰ সম্ভাৱনা থাকিলেও কিছুমান ঠাইত বিজুলী-বজ্ৰপাত আৰু ঢেৰেকনি হোৱাৰো সম্ভাৱনা আছে। বিশেষকৈ সন্ধিয়া আৰু নিশাৰ ভাগত বতৰ সলনি হোৱাৰ সম্ভাৱনা অধিক। সেইবাবে মুক্ত আকাশৰ তলত কাম কৰা লোকসকল, দূৰ-দূৰণিলৈ যাত্ৰা কৰা লোকসকলে সাৱধানতা অৱলম্বন কৰাটো উচিত।
অসমৰ মুঠ ৮খনকৈ জিলাত শনিবাৰৰ বাবে Yellow Alert জাৰি কৰিছে বৰঝাৰস্থিত আঞ্চলিক বতৰ বিজ্ঞান কেন্দ্ৰই। উজনি অসমৰ তিনিচুকীয়া, ডিব্ৰুগড়, চৰাইদেউ, শিৱসাগৰ, যোৰহাট, ধেমাজি, লখিমপুৰ আৰু মধ্য অসমৰ শোণিতপুৰ জিলাত জাৰি কৰা হৈছে Yellow Alert।
ইয়াৰ উপৰি অসমৰ লগতে উত্তৰ-পূৰ্বাঞ্চলৰ আন ৰাজ্যসমূহতো বৰষুণৰ সম্ভাৱনা আছে বুলি কেন্দ্ৰটোৱে জানিবলৈ দিয়ে। আৰ্দ্ৰতা বৃদ্ধি আৰু পশ্চিমীয়া বায়ুৰ প্ৰভাৱৰ ফলত এই বতৰৰ পৰিৱৰ্তন হোৱা বুলি জানিব পৰা গৈছে। কৃষিখণ্ডৰ ক্ষেত্ৰতো এই বৰষুণ উপকাৰী হ’ব পাৰে বুলি কিছুমান বিশেষজ্ঞই মন্তব্য কৰিছে। শস্যৰ খেতিত আর্দ্ৰতা বজাই ৰখাত ই সহায়ক হ’ব পাৰে যদিও বজ্ৰপাতৰ সময়ত পথাৰলৈ নাযাবলৈ কৃষকসকলক পৰামৰ্শ দিয়া হৈছে।
ৰাজ্য চৰকাৰৰ দুৰ্যোগ ব্যৱস্থাপনা বিভাগেও পৰিস্থিতিৰ ওপৰত সততে নজৰ ৰাখিছে বুলি জানিব পৰা গৈছে। বতৰ বিজ্ঞান কেন্দ্ৰই পৰৱৰ্তী ২৪ ঘণ্টাত বতৰৰ ওপৰত নজৰ ৰাখি নতুনকৈ আগজাননী প্ৰদান কৰিব বুলিও উল্লেখ কৰিছে। সাধাৰণ ৰাইজক চৰকাৰী নিৰ্দেশনা মানি চলিবলৈ আৰু বতৰৰ শেহতীয়া আপডেটৰ বাবে চৰকাৰী সূত্ৰসমূহ অনুসৰণ কৰিবলৈ আহ্বান জনোৱা হৈছে।
