অৰুণাচলৰ হাইলঙত ভয়ংকৰ দুৰ্ঘটনা

সোমবাৰে নিশা তিনিচুকীয়াৰ পৰা হায়ুলিয়াং–ছাগলাহগাম অভিমুখী এখন ডাম্পাৰ নিয়ন্ত্ৰণ হেৰুৱাই পথৰ পৰা বাগৰি পাহাৰৰ কাষৰ দ’ গাঁতত পৰাৰ ফলত প্ৰায় ২২ জন শ্ৰমিকৰ মৃত্যু হয়। ইয়াৰে বুধেশ্বৰ দীপ নামৰ এজন শ্ৰমিকে প্ৰাণ বচাই আহি কেম্পত ঘটনাৰ ব্যাখ্যা কৰাত অঞ্চলটোত উদ্ধাৰ অভিযান চলোৱা হয়।

ইতিমধ্যে ঘটনাস্থলীত ১৩গৰাকীৰ শ্ৰমিকৰ মৃতদেহ উদ্ধাৰ কৰা হৈছে। বাকীসকলৰ মৃতদেহ এতিয়াও উদ্ধাৰ হোৱা নাই। মৃত শ্ৰমিকসকলৰ ভিতৰত আছে তিনিচুকীয়াৰ গেলাপুখুৰী চাহ বাগিচাৰ ১৮গৰাকী শ্ৰমিক। উল্লেখ্য যে ডাম্পাৰখনত আছিল ২৩গৰাকী শ্ৰমিক। আহতজনৰ মোবাইল ফোন ঘটনাস্থলীতেই পৰি যোৱা বাবে আৰু সেই অঞ্চলত নেটৱৰ্ক সংযোগ নথকাৰ বাবে পৰিয়ালৰ লোকেও দুৰ্ঘটনাৰ বিষয়ে গম পোৱা নাছিল।