ডিজিটেল ডেস্ক, ANEWS24X7: উৰিষ্যাৰ এগৰাকী মহিলা ক্ৰিকেটাৰৰ মৃতদেহ উদ্ধাৰ ৷ শুক্ৰবাৰে কটক চহৰৰ এখন ঘন অৰণ্যৰ পৰা ৰাজশ্ৰী সোয়াইন নামৰ মহিলা ক্ৰিকেটাৰ গৰাকীৰ মৃতদেহ উদ্ধাৰ কৰা হয় ৷ যোৱা ১১ জানুৱাৰীৰ পৰা সন্ধানহীন হৈ আছিল মহিলা ক্ৰিকেটাৰ গৰাকী ৷ বৃহস্পতিবাৰে ৰাজশ্ৰীৰ প্রশিক্ষকে কটকৰ মঙ্গলাবাগ আৰক্ষী থানাত এটা নিৰুদ্দেশৰ অভিযোগ দাখিল কৰিছিল ৷ ইয়াৰ পিছতে শুক্ৰবাৰে আৰক্ষীয়ে মৃতদেহটো উদ্ধাৰ কৰে ৷
কটকৰ আৰক্ষী উপায়ুক্ত পিনাক মিশ্ৰই কয় যে ,‘‘ মৃতদেহটো আথাগড় অঞ্চলৰ গুৰুদিঝাটিয়া বনাঞ্চলত গছত উলমি থকা অৱস্থাত মৃতদেহটো উদ্ধাৰ কৰা হৈছে ৷ গুৰুদিঝাটিয়া আৰক্ষী থানাত অপ্ৰাকৃতিক মৃত্যুৰ এটা গোচৰ ৰুজু কৰি তদন্ত আৰম্ভ কৰিছে ৷ ’’
ৰাজশ্ৰীৰ পৰিয়ালৰ সদস্যসকলে কয় যে , ‘‘ পুডুচেৰীত অনুষ্ঠিত হ’বলগীয়া এখন ৰাষ্ট্ৰীয় পৰ্যায়ৰ ক্ৰিকেট প্ৰতিযোগিতাৰ বাবে বজৰকাবাটি অঞ্চলত উৰিষ্যা ক্ৰিকেট এছ’চিয়েশ্যনে (অ’চিএ) আয়োজন কৰা প্ৰশিক্ষণ শিবিৰৰ অংশ কৰিছিল ৰাজশ্ৰীয়ে ৷ তেওঁলোক সকলোৱে এলেকাৰ এখন হোটেলত আছিল। উৰিষ্যা ৰাজ্যিক মহিলা ক্ৰিকেট দলটো ১০ জানুৱাৰীত ঘোষণা কৰা হৈছিল ৷ এই দলটোৰ চূড়ান্ত তালিকাত স্থান লাভ কৰা নাছিল ৰাজশ্ৰীয়ে ৷’’
