অবৈধ বাংলাদেশীক সকীয়নি দিলে প্ৰধানমন্ত্ৰী মোদীয়ে

দেওবাৰে কাজিৰঙাৰ এলিভেটেড কৰিড’ৰৰ ভূমি পূজন কৰে প্ৰধানমন্ত্ৰী নৰেন্দ্ৰ মোদীয়ে। কলিয়াবৰত অনুষ্ঠিত বিশাল জনসভাত দুখন অমৃত ভাৰত ৰে’লৰ ফ্লেগ অফ কৰে প্ৰধানমন্ত্ৰী মোদীয়ে। মোদীয়ে ডিব্ৰুগড়-গোমতী নগৰ অমৃত ভাৰত এক্সপ্ৰেছৰ ফ্লেগ অফ কৰাৰ লগতে কামাখ্যা-ৰোহতক অমৃত ভাৰত এক্সপ্ৰেছৰো ফ্লেগ অফ কৰে।

অসমৰ প্ৰকৃতিপ্ৰেমী ৰাইজলৈ প্ৰণাম প্ৰধানমন্ত্ৰীৰ। দূৰ-দূৰণিৰ পৰা অহা জনতাক ধন্যবাদ জ্ঞাপন কৰে প্ৰধানমন্ত্ৰীগৰাকীয়ে। প্রধানমন্ত্ৰী মোদীয়ে কয়, ‘‘পুনৰ কাজিৰঙালৈ অহাৰ মোৰ সৌভাগ্য হ’ল।’’ পূৰ্বৰ কাজিৰঙা ভ্ৰমণৰ স্মৃতি ৰোমন্থন কৰি মোদীয়ে কয়, ‘‘কাজিৰঙাত অতিবাহিত কৰা ক্ষণ অন্যতম স্মৰণীয়। অসমলৈ আহি মই বিশেষ আনন্দ লাভ কৰোঁ। অসমৰ ভূমি বীৰৰ ভূমি। কালি বাগুৰুমবাৰ এক নতুন অভিলেখ গঢ়িলে বড়ো জীয়ৰীয়ে। খামৰ চেও, চিফুঙৰ সুৰে সকলোকে মন্ত্ৰমুগ্ধ কৰিলে। বাগুৰুমবাৰ সুখানুভূতি চকুৰে হৃদয়ত প্ৰৱেশ কৰিলে।’’

মোদীয়ে লগতে কয়, ‘‘এমাহ পূৰ্বে বিকাশৰ পৰিকল্পনা লৈ মই অসমলৈ আহিছিলোঁ।’’ প্ৰধানমন্ত্ৰীৰ বিশেষ ছবি নিৰ্মাণ কৰা শিল্পীক যাচিলে ধন্যবাদ। প্লাষ্টিক বটলেৰে সজা প্ৰতিচ্ছবিখন সংগ্ৰহ কৰিব বুলি ঘোষণা কৰে প্রধানমন্ত্ৰীয়ে। জাগুনৰ শিল্পী বিকাশ শৰ্মাক এই ছবি নিৰ্মাণৰ বাবে প্ৰশংসা প্রধানমন্ত্ৰী মোদীৰ।

‘‘কলিয়াবৰতে লাচিতে মোগলক খেদাৰ ৰণনীতি প্ৰস্তুত কৰিছিল। আহোমৰ দিনৰ পৰাই কলিয়াবৰ ৰণনীতিৰ দিশত গুৰুত্বপূৰ্ণ আছিল।’’ ‘‘বিহাৰত ২০ বছৰ শাসনত থকাৰ পাছতো জনতাই আস্থাত লৈছে। মহাৰাষ্ট্ৰত পৌৰ নিগমৰ নিৰ্বাচনত বিজেপিৰ বৃহৎ জয়। BMCত প্ৰথমবাৰলৈ হ’ব বিজেপিৰ মেয়ৰ। মুম্বাইত জনতাই অভিলেখ হাৰত ভোট দিলে বিজেপিক। জয় মুম্বাইত হৈছে, বিজয়োৎসৱ হৈছে কাজিৰঙাত। কেৰালাৰ জনতায়ো বিজেপিক সমৰ্থন জনাইছে। তিৰুৱনন্তপুৰমত প্ৰথমবাৰৰ বাবে হৈছে বিজেপি মেয়ৰ। দেশৰ ভোটাৰে সু-শাসন আৰু উন্নয়ন বিচাৰে। উন্নয়ন আৰু ঐতিহ্য দুয়োটাকে গুৰুত্ব দিয়ে ভোটাৰে।’’