ডিজিটেল ডেস্ক ANEWS24X7: বিশ্বৰ সৰ্ববৃহৎ গণতন্ত্ৰ ভাৰতৰ আত্মাস্বৰূপ ‘ধৰ্মনিৰপেক্ষতা’ আৰু ‘সমাজবাদী’ এই দুটা শব্দ সংবিধানৰ প্ৰস্তাৱনাৰ পৰা প্ৰত্যাহাৰ কৰা হ’ব নেকি ? এই প্ৰশ্ন এতিয়া সৰ্বত্ৰে চৰ্চা ৷ কিয়নো এইবাৰ সংবিধানৰ প্ৰস্তাৱনাৰ পৰা ‘ধৰ্মনিৰপেক্ষতা’ আৰু ‘সমাজবাদী’ এই শব্দ দুটা পৰিহাৰ কৰিবৰ বাবে উচ্চতম ন্যায়ালয়ত লেখ আবেদন দাখিল কৰিছে ৰাজ্যসভাৰ এজন সাংসদে ৷
ৰাজ্যসভাৰ সংসদ ডঃ সুব্ৰমনিয়াম স্বামীয়ে দাখিল কৰিছে এই বিশেষ আবেদনখন ৷ ইতিমধ্যে উচ্চতম ন্যায়ালয়ৰ ন্যায়াধীশ ইন্দিৰা বেনাৰ্জী আৰু ন্যায়াধীশ এম এম সুন্দৰেশৰে গঠিত খণ্ড বিচাৰপীঠে ইতিমধ্যে গ্ৰহণ কৰিছে এই লেখ আবেদন ৷ অহা ২৩ ছেপ্টেম্বৰৰ পৰা এই আবেদনৰ শুনানী গ্ৰহণ কৰা হ’ব ৷
উল্লেখ্য যে ১৯৫০ চনত ভাৰতীয় সংবিধান গৃহীত কৰাৰ হয়ত সংবিধানৰ প্ৰস্তাৱনাত ‘ধৰ্মনিৰপেক্ষতা’ আৰু ‘সমাজবাদী’ এই শব্দ দুটা নাছিল ৷ পৰবৰ্তী সময়ত ১৯৭৬ চনত তদানীন্তন দেশৰ প্ৰধানমন্ত্ৰী ইন্দিৰা গান্ধীৰ পৃষ্ঠপোষকতাত সংবিধানৰ ৪২সংখ্যক সংশোধন ঘটাই এই দুটা শব্দ সংযোজন কৰা হৈছিল । সেই সময়ছোৱাত দেশত জুৰুৰীকালীন অৱস্থা চলি আছিল ৷
এই সন্দৰ্ভত ৰাজ্যসভাৰ সাংসদ ডঃ সুব্ৰমনিয়াম স্বামীয়ে কয় যে , ‘‘ অবৈধ্য ভাবে ভাৰতীয় সংবিধানৰ প্ৰস্তাৱনাত ‘ধৰ্মনিৰপেক্ষতা’ আৰু ‘সমাজবাদী’ এই শব্দ দুটা সংযোগ কৰা হৈছে ৷ সংবিধানৰ অনুচ্ছেদ ৩৬৮ অনুসৰি জুৰুৰীকালীন পৰিস্থিতিত সংসদে সংবিধান সংশোধন বিধেয়ক গৃহীত কৰিব নোৱাৰে ৷ এনে কৰিলেও সেয়া কেতিয়াও বৈধ নহয় । সংবিধান প্ৰণেতা ডঃ বি আৰ আম্বেদকাৰেও কেতিয়াও এই দুই শব্দ সংবিধানৰ অংশ হোৱাটো বিচৰা নাছিল । এই সংযোজন ফলত নাগৰিকৰ ওপৰৰ এটা বিশেষ ৰাজনৈতিক ধাৰা জাপি দিয়া হয় ।’’
