ডিজিটেল ডেস্ক, ANEWS24X7: কংগ্ৰেছ সভাপতি মল্লিকাৰ্জুন খৰ্গে বুধবাৰে কয় যে বিজয় চকৰ ওচৰত চিআৰপিচিৰ ১৪৪ ধাৰা জাৰি কৰাটো দেশত যে “গণতন্ত্ৰ বিপদত আছে” সেয়া প্ৰমাণ কৰিবলৈ উপযুক্ত উদাহৰণ। বিৰোধী সাংসদসকলক বিজয় চকত আৰক্ষীয়ে বাধা দিয়াৰ পিছতেই তেওঁ এই মন্তব্য কৰে৷ আদানি সমূহৰ তথাকথিত কেলেংকাৰীৰ তদন্ত বিচাৰি প্ৰৱৰ্তন সঞ্চালকালয়ৰ কাৰ্যালয়লৈ যাত্ৰা কৰিছিল বিৰোধী সাংসদ সকলে।
বুধবাৰে আবেলি বহুকেইটা বিৰোধী দলৰ নেতাই সংসদৰ বাজেট অধিৱেশনৰ দ্বিতীয় পৰ্যায়ত সংসদৰ পৰা প্ৰৱৰ্তন সঞ্চালকালয়ৰ (ইডি) কাৰ্যালয়লৈ এক প্ৰতিবাদী সমদল আৰম্ভ কৰে।
মল্লিকাৰ্জুন খাৰ্গেই কয়, “এফালে বিজেপিয়ে গণতন্ত্ৰত বিশ্বাস কৰাৰ কথা কয়, আনহাতে তেওঁলোকে জনাদেশ থকা সাংসদৰ শান্তিপূৰ্ণ পদযাত্ৰা বন্ধ কৰে। আমাক ইডি কাৰ্যালয়ত স্মাৰকপত্ৰ দাখিল কৰাত বাধা দিয়াটো বিজেপিৰ ভুল আছিল। আমি ইয়াক গৰিহণা দিছো”।
তেওঁ লগতে কয়, “আমি কেৱল শান্তিপূৰ্ণভাৱে স্মাৰকপত্ৰ দাখিল কৰি উভতি আহিব বিচাৰিছিলো, আমাক অনুমতি দিয়া উচিত আছিল।” কংগ্ৰেছৰ ৰাষ্ট্ৰীয় সভাপতিগৰাকীয়ে দৃঢ়তাৰে কয় যে আদানী গোচৰৰ তদন্তৰ বাবে চৰকাৰে জেপিচি গঠনত বিলম্ব কৰিছে।
লক্ষণীয়ভাৱে তৃণমূল কংগ্ৰেছ আৰু নেচনেলিষ্ট কংগ্ৰেছ পাৰ্টিয়ে এই প্ৰতিবাদী সমদলত অংশগ্ৰহণ কৰা নাই।
ইয়াৰ পূৰ্বে সোমবাৰে সংসদত বিৰোধী দলৰ নেতাসকলৰ এখন বৈঠকত ১৬ টা দলে অংশগ্ৰহণ কৰে, যাৰ সভাপতিত্ব কৰে ৰাজ্যসভাৰ বিৰোধী দলৰ নেতা মল্লিকাৰ্জুন খাৰ্গে। ভাৰতীয় জাতীয় কংগ্ৰেছ; দ্ৰাবিড় মুন্নেত্ৰা কাঝাগম (ডিএমকে), সমাজবাদী পাৰ্টি; জনতা দল (ইউনাইটেড); আম আদমী পাৰ্টি; ভাৰতীয় কমিউনিষ্ট পাৰ্টি (মাৰ্ক্সবাদী); কেৰালা কংগ্ৰেছ; জাতীয়তাবাদী কংগ্ৰেছ পাৰ্টি; ভাৰতীয় কমিউনিষ্ট পাৰ্টি; ইণ্ডিয়ান ইউনিয়ন মুছলিম লীগ; শিৱসেনা (উদ্ধৱ ঠাকৰে); মাৰুমালাৰ্চি দ্ৰাবিড় মুন্নেত্ৰা কাঝাগম; ৰাষ্ট্ৰীয় জনতা দল; ঝাৰখণ্ড মুক্তি মৰ্চা; বিদুথালাই চিৰুথাইগাল কাচ্চি আৰু এনচি এই সভাত উপস্থিত আছিল।
