গুৱাহাটী ২৪ নৱেম্বৰ:-অসম অভিযান্ত্ৰিক মহাবিদ্যালয় চৌহদত অৱস্থিত সুৰজিৎ একাডেমীৰ উদ্যোগত দেওবাৰে শ্ৰীমন্ত শঙ্কৰদেৱ কলাক্ষেত্ৰৰ ড• বানীকান্ত কাকতি প্ৰেক্ষাগৃহত সীমান্ত শৰ্মাৰ ৰচনা আৰু পৰিচালনাত ‘মঙহ্’ নাটখন সফলতাৰে মঞ্চস্থ হয়। নাটৰ সন্ধিয়াত মুখ্য অতিথি হিচাপে অসম ৰাজ্যিক মানৱ অধিকাৰ আয়োগৰ সদস্য শান্তনু ভৰালী, বিশিষ্ট অতিথি হিচাপে উপস্থিত থাকে কথাছবি পৰিচালক ধীৰাজ কাশ্যপ আৰু সাংবাদিক উৎপল মেনা। নাটৰ কাৰ্যক্ৰমত এখন সুন্দৰ কাহিনীৰ আধাৰত নাটখন পৰিৱেশিত হয়। নাটখনত প্ৰধানতঃ নাৰী- ত্যাগৰ অন্য এক নাম, সাহসৰ এক প্ৰতীক হিচাপে দাঙি ধৰিছে । সময়ে সময়ে পৰিস্থিতি তথা সমাজৰ এক শ্ৰেণীৰ লোকৰ দ্বাৰা অৱহেলিত, অপমানিত আৰু লাঞ্ছিত হৈ আহিছে নাৰী।
শেৱালী – এক নতুন, এক প্ৰতিভাৰ নাম আছিল কিন্তু বংশীধৰৰ কু-দৃষ্টিৰ প্ৰভাৱত সেই প্ৰতিভা কলিতে মোহাৰি পেলোৱা হৈছিল। শেৱালীৰ প্ৰেম, শেৱালীৰ ভৱিষ্যত শেষ কৰি পেলোৱা হৈছিল। সময়ৰ ওচৰত হাৰ নামানি শেৱালী সমাজত কিছু অৱহেলিত, অনাথ শিশুৰ দায়িত্ব লৈ নতুনকৈ প্ৰতিষ্ঠা কৰিছিল নিজক। কিন্তু অতীতৰ ক’লা ইতিহাসে শেৱালিক পিছ এৰা নাছিল। নিজৰ সন্তানৰ দৰে ডাঙৰ-দীঘল কৰা সেই শিশুসকলৰ এজনক হত্যা কৰি শেৱালীক শেষ কৰাৰ ষড়যন্ত্ৰ কৰিছিল।
কিন্তু নাৰীৰ ওপৰত যেতিয়া অত্যাচাৰ, শোষণ বেছি হয় এই ধৰাত আৱিৰ্ভাৱ হয় দেৱীৰ ৰূপ। দুৰ্গা, কালি, চণ্ডীৰ ৰূপত নাৰীয়ে শেষ কৰে সমাজৰ অপশক্তিক, অন্ধকাৰ আঁতৰাই পোহৰাই তোলে জগত। সমাজৰ ঋণাত্মক শক্তিক আঁতৰাই ধনাত্মক আদৰ্শ প্ৰতিষ্ঠা কৰে নাৰীৰ সেই ৰূপে। শেষ কৰে সমাজৰ দানৱক। নাটক খন শক্তিশালী ৰূপত নাৰীক দেখুওৱা হৈছে। নাট খনত নাট্য শাস্ত্ৰৰ নৱ ৰস সুন্দৰ ভাৱে উপস্থাপন কৰিছে। নাটৰ প্ৰতিটো দৃশ্যত অসমীয়া সাহিত্যৰ শব্দ উচ্চ পৰ্য্যায়ৰ গাঠনি দাঙি ধৰিছে । কতো অলাগতিয়াল শব্দ ব্যবহাৰ কৰা নাই। নাট্যকাৰে সুন্দৰ ভাৱে সমাজৰ নিত্য নৈমিত্তিক ঘটনাৰ এক চিত্ৰ অংকন কৰিছে। নাটৰ প্ৰতিটো চৰিত্ৰ সমাজত দেখি থকা এক বাস্তৱ চৰিত্ৰ। পৰিচালনাৰ ক্ষেত্ৰতো সফলতা অৰ্জন কৰিছে সীমান্ত শৰ্মা।
নাটৰ প্ৰতিটো ঘটনাৰ চৰিত্ৰ সমূহ সুন্দৰ ভাৱে অভিনয় কৰিছে শিল্পী সকলে। নাটৰ মুখ্য চৰিত্ৰ আই আৰু শেৱালী চৰিত্ৰত অভিনয় কৰা কৰিস্মিতা তালুকদাৰৰ অভিনয়ে দৰ্শকক আপ্লুত কৰি তুলিছে। দুৰ্দান্ত অভিনয় কৰিছে কৰিস্মিতা তালুকদাৰে।নাৰীৰ কষ্ট, অত্যাচাৰ সহি সহি কি দৰে শেষত ৰুদ্ৰ ৰূপ ধাৰণ কৰি ‘কালি মা’ লৈ ৰূপান্তৰ হোৱা মুহূৰ্তৰ শক্তিশালী অভিনয় দেখি দৰ্শক স্তম্ভিত হৈ পৰিছিল। উচ্চ স্বৰে নাৰীক দমন কৰাৰ প্ৰতিশোধ লোৱাৰ যি অভিনয় কৰিছিল সেই ক্ষেত্ৰত কৰিস্মিতা তালুকদাৰ প্ৰশংসাৰ পাত্ৰ। নাট খন আৰম্ভণিৰ পৰা শেষলৈ শক্তিশালী ৰূপত দাঙি ধৰিছে কৰিস্মিতা তালুকদাৰে। নাট খনৰ হৰেন আৰু যাদৱৰ চৰিত্ৰত অভিনয় কৰা হেমেন সেনাপতি আৰু প্ৰণৱ জ্যোতি ৰাভাৰ অভিনয়ে দৰ্শকক আমোদ দিছিল। সুন্দৰ ভাৱে খুহুতীয়া অভিনয় কৰে। হেমেন সেনাপতিৰ অভিনয়, সংলাপ নিক্ষেপ সুন্দৰ কৈ চৰিত্ৰত ফুটাই তুলিছে। সমাজসেৱিকা ৰূপত হিমাদ্ৰী চৰিত্ৰত অভিনয় কৰা জেচমিনা হুছেইনৰ অভিনয় সুন্দৰ।
সমাজৰ এক ব্যভিচাৰী, দুষ্কাৰ্য সংঘটিত কৰা ধুৰন্ধৰ নাৰী চৰিত্ৰৰ পৰিৱেশ সৃষ্টি কৰে অভিনয়ৰ জৰিয়তে জেছমিনা হুছেইনে। নাৰী হৈ নাৰীক কি দৰে শোষণ কৰে সুন্দৰ কৈ ফুটাই তুলিছে। মণ্টু চৰিত্ৰত অভিনয় কৰা হাৰ্দিক শৰ্মাৰ অভিনয়ে দৰ্শকৰ হৃদয় স্পৰ্শ কৰি তুলিছিল। ফুট পাথত থাকিও নিজৰ অধ্যায়নৰ লগতে সমাজৰ হিতৰ কাৰণে যি চিন্তাত মগ্ন সেয়া সুন্দৰ কৈ ফুটাই তুলিছে হাৰ্দিক শৰ্মাই। শিশুৰ চৰিত্ৰত অভিনয় কৰা অংশুমন দাস, কৃষ্টি ৰাজবংশী, পলক কৈৰী, লিয়না দেৱ, আৰিয়া জিব্ৰান, কৌস্তুভ চৌধুৰী, অৰিত্ৰিকা বৰুৱাৰ অভিনয় যথাযথ। কোনো ধৰণৰ জড়তা নাছিল। বংশীধৰৰ অভিনয়ৰ ধ্ৰুৱ জ্যোতি কলিতাৰ অভিনয় এক ব্যতিক্ৰম ধৰ্মী হৈছে। সমাজ কলুষিত কৰা এক শ্ৰেণীৰ দানৱৰ চৰিত্ৰ।
সমাজ ধংস কৰা যেন জীৱন লক্ষ্য তেনে এটি ধাৰা বজাই ৰাখিছে ধ্ৰুৱ জ্যোতি কলিতাই। নাটখনৰ সহকাৰী পৰিচালক বিনীতা দেৱী আৰু হেমেন সেনাপতি। নাটখনৰ সংগীত পৰিচালনা কৰিছে গৌতম শইকীয়া। সংগীতৰ পৰিৱেশে নাট খনৰ প্ৰতিটো দৃশ্য সুন্দৰ ভাৱে উপস্থাপন কৰিছে। সংগীতৰ কণ্ঠ প্ৰদান কৰিছে চন্দামিতা ডেকা। সংগীতৰ সহযোগী দীপা মহন্ত, নৃত্য পৰিচালনা প্ৰণৱ জ্যোতি ৰাভা, ৰূপ সজ্জা জ্যোতিস্মিতা কলিতা, পোহৰ কৃতাৰ্থ শৰ্মা, মঞ্চসজ্জা গনেশ বড়ো, সাজসজ্জা তৃষ্ণা কলিতা আৰু হিমাংশু দাসৰ।
নাটখনৰ বিভিন্ন চৰিত্ৰত অভিনয় কৰিছে কৰিস্মিতা তালুকডাৰ, জেছমিনা হুছেইন, হেমেন সেনাপতি, ধ্ৰুৱজ্যোতি কলিতা, প্ৰণৱ জ্যোতি ৰাভা, হাৰ্দিক শৰ্মা, কৃষ্টি ৰাজবংশী, লিয়ানা দেৱ, পলক কৈৰী, অৰিত্ৰিকা বৰুৱা, অংশুমান দাস, কৌস্তভ চৌধুৰী, আৰিয়া জিব্ৰান, ববিতা দাস। সীমান্ত শৰ্মাৰ ৰচনা আৰু পৰিচালনাত “মঙহ্” নাট খনে শ্ৰীমন্ত শঙ্কৰদেৱ কলাক্ষেত্ৰৰ বানীকান্ত কাকতি প্ৰেক্ষাগৃহত সন্ধিয়াৰ এক সুন্দৰ মুহূৰ্ত উপভোগ কৰিলে দৰ্শকে । তেখেতৰ বহুকেইখন নাট ইতিমধ্যে সুনাম কঢ়িয়াইছে। তেখেতৰ পৰিচালনাৰ বিশেষত্ব এয়ে যে তেওঁ অভিনয় কৰা সকলক নাটকৰ আদি পাঠ শিকাই বুজাই মঞ্চত উঠাই প্ৰতিষ্ঠিত কৰোৱাই। তেখেতে অসমৰ লগতে ভাৰতৰ বিভিন্ন ৰাজ্যত পুতলা নাটো বহু কেইখন পৰিৱেশিত কৰিছে।
