আৰজেডিৰ বিপৰ্যয়ৰ পিছতে ৰাজনীতি এৰিলে লালু কন্যাই, পৰিয়ালো পৰিত্যাগ কৰিলে ৰোহিণীয়ে। লালু প্ৰসাদৰ কন্যা ৰোহণী আচাৰ্যই বিবৃতিযোগে ৰাজনীতি এৰাৰ কথা জনালে।
আজি বিবৃতি দি ৰোহিণীয়ে এক্স হেণ্ডেলত পোষ্ট কৰি লিখে, ‘মই ৰাজনীতি এৰিছো, লগতে নিজৰ পৰিলো পৰিত্যাগ কৰিছো। সঞ্জয় যাদৱ আৰু ৰামিজেই বিচাৰিছিল মই এয়া কৰাটো। সকলো দায়িত্ব মই লৈছো।’’
আৰজেডিৰ ভিতৰচ’ৰাত ৰাজ্যসভাৰ সাংসদ সঞ্জয় যাদৱ লালু পুত্ৰ তেজস্বী যাদৱৰ ঘনিষ্ঠ সহযোগী হিচাপেই পৰিচিত। ৰামিজ আকৌ এই সঞ্জয়ৰ ঘনিষ্ঠ। ৰাজনৈতিক বিশ্লেষকসকলৰ মতে, নিজৰ ভাতৃ তেজস্বীৰ ওপৰত চাপ দিবলৈয়ে এই বিবৃতি দিছে ৰোহিণীয়ে। কাৰণ আৰজেডিৰ বিপৰ্যয়ৰ বাবে এই সঞ্জয় যাদৱকেই দায়ী কৰিছে বহুতেই। ইয়াৰ পূৰ্বে সঞ্জয় যাদৱৰ বিৰুদ্ধে পৰিয়ালত ফাট ধৰোৱাৰ অভিযোগ তুলিছিল লালুৰ ত্যাজ্য পুত্ৰ তেজপ্ৰতাপ যাদৱেও। ৰাজনৈতিক বিশ্লেষকসকলৰ মতে, তেজস্বীয়ে যাতে সঞ্জয়ৰ বিৰুদ্ধে ব্যৱস্থা লয়, সেই চাপ দিয়াৰ বাবেই এইবাৰ বিদ্ৰোহ কৰিলে লালু কন্যা ৰোহিণীয়ে।
