ডিজিটেল ডেস্ক, ANEWS24x7: গুজৰাটত অনুষ্ঠিত হৈ থকা ৩৬ সংখ্যক ৰাষ্ট্ৰীয় ক্ৰীড়া প্ৰতিযোগিতাৰ ছেমি ফাইনেলত প্ৰৱেশ অসমৰ দুগৰাকী ক্ৰীড়াবিদ ৷ দেওবাৰে কোৱাৰ্টাৰ ফাইনেল মেচত ৭০-৭৫ কেজি শাখাত কেৰেলাৰ প্ৰতিদ্বন্দী কে এ ইন্দ্ৰজাক ৫-০ স্ক’ৰেৰে পৰাস্ত কৰি ছেমি ফাইনেলত প্ৰৱেশ কৰে অলিম্পিক বিজয়ী লাভলীনা বৰগোহাঁইয়ে ৷
আনহাতে বিশ্ব চেম্পিয়নশ্বিপ আৰু একাধিক এছিয়ান পদক বিজয়ী অসমৰ শিৱ থাপাই পঞ্জাৱৰ বিকাশক ৫-০ স্ক’ৰত পৰাস্ত কৰি ছেমিফাইনেলত প্ৰৱেশ কৰে ৷ ইয়াৰ উপৰিও অসমৰ আন এগৰাকী মল্লযোদ্ধা ফুইলাও বসুমতাৰীয়ে হিমাচল প্ৰদেশৰ ডিম্পল উপাধ্যায়ক পৰাস্ত কৰি ছেমি ফাইনেলত প্ৰৱেশ কৰে ৷
দেওবাৰৰ দিনটোতে অসমৰ উশ্বু খেলুৱৈসকলেও ৩ টা পদক লাভ কৰিছে। টাইজিকুয়ান আৰু টাইজিজন পুৰুষ শাখাত চানমা ব্ৰহ্মই ৰূপৰ পদক অৰ্জন কৰে, ৰংগিলা দৈমাৰীয়ে নানকুয়ান আৰু নন্দাও মহিলা শাখাত ৰূপৰ পদক অৰ্জন কৰে আৰু সঞ্জীৱ কুমাৰ সিঙে নানকুয়ান আৰু নানগুন পুৰুষ শাখাত ব্ৰঞ্জৰ পদক অৰ্জন কৰিছে।
