ইম্ফলত ১২০০ কোটি টকাৰ প্ৰকল্পৰ আধাৰশিলা স্থাপন। এক জনসভাক সম্বোধন কৰি মোদীয়ে কয়, ‘‘ইম্ফলকে ধৰি সমগ্ৰ মণিপুৰত ষ্টাৰ্টআপৰ নতুন সম্ভাৱনা উদয় হৈছে। কলকাতা আৰু দিল্লীত মণিপুৰ ভৱনৰ নিৰ্মাণে ৰাইজক সকাহ দিব। GST হ্ৰাসে মণিপুৰৰ ৰাইজক দুগুণ সকাহ দিব। মণিপুৰত যিকোনো হিংসা দুৰ্ভাগ্যজনক। এনে হিংসা পূৰ্বপুৰুষ আৰু ভৱিষ্যৎ প্ৰজন্মৰ বাবে অন্যায়।’’
দেশৰ স্বাধীনতা আৰু প্ৰতিৰক্ষাত মণিপুৰৰ অৱদান অতুলনীয়। নেতাজীয়ে মণিপুৰক ভাৰতৰ স্বাধীনতাৰ দুৱাৰ বুলি কৈছিল। এনে মহান মনীষীসকলৰ আদৰ্শক লৈ মণিপুৰক আমাৰ চৰকাৰে আগুৱাই নিব। মণিপুৰৰ সংস্কৃতি অবিহনে ভাৰতৰ সংস্কৃতি আধৰুৱা। মণিপুৰৰ খেলুৱৈ অবিহনে ভাৰতৰ খেলজগত আধৰুৱা। মণিপুৰৰ নৱপ্ৰজন্মক হিংসাৰ কলিয়া ডাৱৰেৰে ঢাকিব দিব নোৱাৰি। মণিপুৰৰ বাবে ৩ হাজাৰ কোটিৰ বিশেষ পেকেজ ঘোষণা কৰা হৈছে বুলিও উল্লেখ কৰে প্ৰধানমন্ত্ৰীয়ে।
ইম্ফল সম্ভাৱনাৰ চহৰ। বিজেপিৰ আমোলত মণিপুৰত দ্ৰুত উন্নয়ন হৈছে। আজি ইম্ফলত এক জনসভাক সম্বোধন কৰি এই মন্তব্য কৰে প্ৰধানমন্ত্ৰী নৰেন্দ্ৰ মোদীয়ে। আজি দুদিনীয়া উত্তৰ-পূব ভ্ৰমণৰ কাৰ্যসূচীৰে প্ৰথমে মিজোৰামত উপস্থিত হয় প্ৰধানমন্ত্ৰীগৰাকী। মিজোৰামৰ পৰা উপস্থিত হয় মণিপুৰত। মণিপুৰৰ চুড়াচান্দপুৰত স্থানচ্যুত লোকক সাক্ষাৎ কৰে প্ৰধানমন্ত্ৰী মোদীয়ে। হিংসাৰ বলি হোৱা লোকসকলৰ ভিতৰত সংঘাতত ঘৰ-দুৱাৰ হেৰুৱাই পেলোৱা পৰিয়ালসমূহো আছিল। ইয়াৰ পাছত তেওঁ ৭৩০০ কোটি টকাৰ উন্নয়নমূলক প্ৰকল্পৰ আধাৰশিলা স্থাপন কৰে। চুড়াচান্দপুৰৰ পাছত ইম্ফললৈ যায় প্ৰধানমন্ত্ৰী মোদী।
