ডিজিটেল ডেস্ক, ANEWS24X7: কংগ্ৰেছ নেত্ৰী প্ৰিয়ংকা গান্ধী ভাদ্ৰাই আজি দিল্লীৰ যন্তৰ মন্তৰত প্ৰতিবাদ সাব্যস্ত কৰা মল্লযুঁজাৰুসকলক সাক্ষাৎ কৰি মহিলা খেলুৱৈৰ যৌন শোষণৰ অভিযোগৰ বিৰুদ্ধে ব্যৱস্থা গ্ৰহণৰ দাবীক সমৰ্থন কৰে। ইণ্ডিয়া ৰেছলিং ফেডাৰেচনৰ মুৰব্বী ব্রিজ ভূষণ শৰণ সিঙক যৌন নিৰ্যাতনৰ অভিযোগত গ্ৰেপ্তাৰ কৰাৰ দাবীত মল্লযুঁজাৰুসকলে ধৰ্ণা কাৰ্যসূচী ৰূপায়ণ কৰে।
পুৱা যন্তৰ মন্তৰত উপস্থিত হৈ প্ৰিয়ংকা গান্ধীয়ে মল্লযুঁজাৰুৰ সৈতে মত বিনিময় কৰে।
দৰাচলতে, WFIৰ সভাপতি ব্ৰীজ ভূষণ শৰণ সিঙৰ দ্বাৰা যৌন অসদাচৰণৰ অভিযোগত দেশৰ শীৰ্ষ মল্লযোদ্ধাসকলে দিল্লীৰ যন্তৰ–মন্তৰত কেইবা দিনৰ পৰা প্ৰতিবাদ কৰি আছে। তেওঁলোকে এই সন্দৰ্ভত এক আবেদনো দাখিল কৰিছিল। শুকুৰবাৰে উচ্চতম ন্যায়ালয়ে এই আবেদনৰ শুনানি কৰে আৰু ইয়াৰ পিছতেই দিল্লী আৰক্ষীয়ে ব্ৰীজ ভূষণৰ বিৰুদ্ধে দুটাকৈ গোচৰ ৰুজু কৰে।
মল্লযুঁজাৰুসকলে উচ্চতম ন্যায়ালয়ত অভিযোগ দিয়াৰ পিছতে শুকুৰবাৰে ভাৰতীয় মল্লযুঁজ ফেডাৰেচনৰ মুৰব্বীগৰাকীৰ বিৰুদ্ধে দুটা গোচৰ ৰুজু কৰে দিল্লী আৰক্ষীয়ে। ইয়াৰে এটা এফআইআৰ হৈছে নাবালকৰ যৌন নিৰ্যাতনৰ অভিযোগ, যিটো কঠোৰ যৌন অপৰাধৰ পৰা শিশু সুৰক্ষা (পিঅ’চিএছঅ’) আইন অনুসৰি দাখিল কৰা হৈছে, য’ত জামিন বাতিল কৰা হৈছে।
কিন্তু আৰক্ষীৰ ব্যৱস্থা লোৱাৰ আশ্বাস দিয়াৰ পিছতো মল্লযুঁজাৰুসকলে ডব্লিউ এফ আইৰ মুৰব্বীগৰাকীক “তৎকালীনভাৱে গ্ৰেপ্তাৰ” কৰাৰ দাবী জনাই ধৰ্ণা কাৰ্যসূচী অব্যাহত ৰাখিব বুলি কয়। “আমি উচ্চতম ন্যায়ালয়ৰ নিৰ্দেশক সন্মান কৰো, কিন্তু দিল্লী আৰক্ষীৰ ওপৰত আমাৰ বিশ্বাস নাই। এই যুঁজখন এফআইআৰৰ বাবে নহয়। এই যুঁজখন তেওঁৰ দৰে লোকক শাস্তি দিয়াৰ বাবে। তেওঁক জেলত ৰখাৰ প্ৰয়োজন আৰু তেওঁৰ পৰ্টফলিঅ’ কাঢ়ি লোৱাটো প্ৰয়োজন।” মল্লযুঁজাৰুসকলে ক’লে।
প্ৰিয়ংকা গান্ধীয়ে সাংবাদিকৰ আগত কয় যে “মই ন্যায়পালিকাৰ সিদ্ধান্তত সুখী। দিল্লী আৰক্ষীয়ে অভিযোগৰ তদন্ত কৰিব, আৰু মই তেওঁলোকক সম্ভৱপৰ সকলো ধৰণে সহযোগিতা কৰিবলৈ সাজু। এই দেশত ন্যায়পালিকাতকৈ ডাঙৰ কোনো নাই। এফআইআৰ ( প্ৰথম তথ্য প্ৰতিবেদন)।চৰকাৰে এফ আই আৰ দাখিল কৰাত কোনো আপত্তি নাই বুলিও কৈছিল।মই উচ্চতম ন্যায়ালয়তকৈ ডাঙৰ নহয়।মই এই নিৰ্দেশক আদৰণি জনাইছো।’
