এজাক বৰষুণ হৈ আকৌ যেন নামি আহিল জুবিন। ৩১ অক্টোবৰৰ পুৱতি নিশা ৪ বাজি ২৫ মিনিটৰ প্ৰথম দৰ্শনীৰ পূৰ্বে আহিল এজাক বৰষুণ। অসমবাসীৰ মৰম, শ্ৰদ্ধা দেখি যেন আকৌ ‘ৰৈ ৰৈ বিনালে’ৰ প্ৰথম দৰ্শনীৰ পূৰ্বে বৰষুণ হৈ নামি আহিল জুবিন। জুবিন নামৰ বৰষুণজাকে যেন ধুৱাই নিলে সমগ্ৰ অসমক। বৰষুণজাক অহাৰ লগে লগে অনুৰাগীসকলে ক’লে ‘জুবিনদাই আমাক চাই আছে’। আৱেগিক হৈ পৰিল সকলো।প্ৰথম দৰ্শনীৰ শেষত কান্দি কান্দি ওলাই আহিল সকলো।
ঠুকাঠুকি মাতেৰে এগৰাকী বৃদ্ধাই ক’লে ‘‘জুবিন মোৰ ল’ৰাৰ নিচিনা আছিল। কেনেকৈনো সি নাই বুলি ভাবো। তাকে এবাৰ চাবলৈ আহিলো।’’
প্ৰথম দৰ্শনী চাই জুবিন অনুৰাগীয়ে ক’লে ‘‘প্ৰভুক শেষবাৰৰ কাৰণে জীৱন্ত ৰূপত চালো।’’ সঁচাকৈয়ে জুবিনময় হৈ পৰিল অসমখন। শিৱসাগৰৰ ভটীয়াপাৰস্থিত ভাস্কৰজ্যোতি চিত্ৰগৃহত প্ৰথম দৰ্শনীৰ পূৰ্বে অনুৰাগীসকলে গালে ‘‘মায়াবিনী ৰাতিৰ বুুকুত।’’
দৰ্শকৰ বিপুল সঁহাৰি দেখি আৱেগিক হৈ পৰিল গৰিমা শইকীয়া গাৰ্গ। গৰিমাই ক’লে ‘‘জুবিনে বৰষুণজাক ভাল পাইছিল। আজি ৰাতিপুৱা অহা বৰষুণজাকে তেওঁ থকাৰ আশ্বাস দিছে। ছিংগাপুৰৰ পৰা অহাৰ দিনাও তেওঁ এজাক বৰষুণ হৈ আহিছিল। আজিৰে পৰা অসমীয়া চিনেমাৰ জয়যাত্ৰা আৰম্ভ।’’
