ডিজিটেল ডেস্ক, ANEWS24X7: মানুহ মাত্ৰে ৰুচি ভিন্ন ভিন্ন ৷ ব্যক্তি বিশেষে কেতিয়াবা কেতিয়াবা দু-সাহসিক ৰুচি থকাও পৰিলক্ষিত হয় ৷ পিছে কেতিয়াবা এনে ৰুচিৰ ফলত মৃত্যুকো আকোৱালি ল’বলগীয়া হৈছে বহুজনে ৷ শেহতীয়াভাবে এনে এক দু-সাহসিক ৰুচিৰ বাবে এক ভয়ংকৰ দুৰ্ঘটনাত পতিত হৈ মৃত্যু মুখত পৰিল এগৰাকী সুন্দৰী টিকটক তাৰকা ৷
ঘটনাৰ বিবৰণ অনুসৰি ২১ বছৰীয়া এইগৰাকী সুন্দৰী টিকটক তাৰকাৰ স্বাইডাইভিং কৰাৰ এক চখ আছিল ৷ এই চখ পূৰণ কৰিবৰ বাবে স্বাইডাইভিং কৰোতে এক দুৰ্ঘটনাত পতিত হয় টিকটক তাৰকা গৰাকী ৷স্বাইডাইভিংৰ সময়ত পেৰাচুট খোল নোখোৱাৰ বাবে এই ভয়ংকৰ দুৰ্ঘটনাটো সংঘটিত হয় ৷ দুৰ্ঘটনাটো সংঘটিত হোৱাৰ পিছত চিকিৎসালয়লৈ লৈ যোৱা হৈছিল যদিও চিকিৎসকে মৃত ঘোষণা কৰে ৷ মৃত টিকটক তাৰকা গৰাকী কানাডাৰ তানিয়া পাৰ্ডেজি ৷ টিকটক তাৰকাৰ আকস্মিক মৃত্যুয়ে তেওঁৰ অনুগামীসকলক হতবাক কৰি তুলিছে ।
