আজি জুবিন গাৰ্গৰ মৃত্যুৰ গোচৰৰ চতুৰ্থটো শুনানি সম্পন্ন হয়। জিলা সত্ৰ ন্যায়াধীশৰ আদালতত সম্পন্ন হয় গোচৰৰ শুনানি। আদালতে গোচৰটোৰ পৰৱৰ্তী শুনানিৰ দিন ধাৰ্য কৰে ২২ জানুৱাৰী। আজি আদালতৰ পৰা চৰকাৰী পক্ষই ল’লে সময়।
আজি আদালতত উপস্থিত থাকে জুবিন গাৰ্গৰ পত্নী গৰিমা শইকীয়া গাৰ্গ, তদন্তকাৰী বিষয়া মৰমী দাস, অমৃতপ্ৰভা মহন্তৰ অধিবক্তাৰ লগতে লোক অধিবক্তা জীয়াউল কামাৰ। আদালতত চৰকাৰী পক্ষৰ অধিবক্তাই প্ৰদৰ্শন কৰে যুক্তি।
ইফালে, শনিবাৰে জুবিন গাৰ্গৰ মৃত্যুৰ ঘটনাৰ অন্যতম অভিযুক্ত অমৃতপ্ৰভা মহন্তৰ জামিন আবেদনৰ শুনানি গ্ৰহণ কৰাৰ কথা আছিল যদিও সেই শুনানিও ২২ জানুৱাৰীলৈকে স্থগিত ৰাখে আদালতে।
আজিৰ এই শুনানিত ভাৰ্ছুৱেলী অংশগ্ৰহণ কৰে অভিযুক্তই। শ্যামকানু মহন্ত, সিদ্ধাৰ্থ শৰ্মা, অমৃতপ্ৰভা মহন্ত, শেখৰজ্যোতি গোস্বামী, সন্দীপন গাৰ্গৰ লগতে জুবিন গাৰ্গৰ দুই দেহৰক্ষীয়ে ভাৰ্ছুৱেলী অংশগ্ৰহণ কৰে শুনানি প্ৰক্ৰিয়াত।আজি আদালতত চৰকাৰে নিযুক্তি দিয়া ৫ অধিবক্তাৰ দলে আজি যুক্তি প্ৰদৰ্শন কৰে। ইফালে, ২২ জানুৱাৰীত অমৃতপ্ৰভা মহন্তই জামিন লাভ কৰিব নেকি তাক লৈ এতিয়া চলিছে চৰ্চা।
জুবিন হত্যাৰ গোচৰ সন্দৰ্ভত উকীল সন্থাৰ সম্পাদক অধিবক্তা অপূৰ্ব শৰ্মাই কয়, ‘‘২২ জানুৱাৰীত জামিন আবেদনৰ শুনানি হ’ব। ৩০ জানুৱাৰীত গোচৰটোৰ ৰেগুলাৰ শুনানি হ’ব। শেখৰৰ স্বাস্থ্যৰ অৱনতি হোৱা দৰ্শাই অধিবক্তাই আদালতত দাখিল কৰে আবেদন। উপযুক্ত চিকিৎসা বিচাৰি আদালতত আবেদন কৰিছে অধিবক্তাই। চৰকাৰে বিশেষ আদালতৰ ব্যৱস্থা কৰি গোচৰটো চলাব লাগে। Day to day শুনানি হ’লেহে জুবিন গাৰ্গে ন্যায় পাব।’’
