নীতিশ কুমাৰে প্ৰতাৰণা কৰে সকলোকেঃ কেন্দ্ৰীয় গৃহমন্ত্ৰী অমিত শ্বাহ

ডিজিটেল ডেস্ক, ANEWS24X7: বিহাৰত বিজেপিৰ বিশাল শোভাযাত্ৰা ৷ বিহাৰত বিজেপি মিত্ৰজোটৰ চৰকাৰ ভংগ হোৱাৰ পিছত প্ৰথমবাৰলৈ বিহাৰলৈ আহে কেন্দ্ৰীয় গৃহমন্ত্ৰী অমিত শ্বাহ ৷ অমিত শ্বাহে শনিবাৰে বিহাৰৰ পুনিয়াত শোভাযাত্ৰাত অংশগ্ৰহণ কৰি বিহাৰৰ মুখ্যমন্ত্ৰী নীতিশ কুমাৰক তীব্ৰ আক্ৰমণ কৰে ৷

অমিত শ্বাহে বিহাৰৰ মুখ্যমন্ত্ৰী নীতিশ কুমাৰক আক্ৰমণ কৰি কয় যে ,‘‘কেৱল প্ৰধানমন্ত্ৰী হ’বলৈ বিজেপিৰ সৈতে মিত্ৰতা ভংগ কৰিছে নীতিশ কুমাৰে ৷ নীতিশ কুমাৰৰ জেডিইউ দলে বিগত বিধানসভা নিৰ্বাচনত বিজেপিয়ে লাভ কৰা আসনৰ আধা আসনহে লাভ কৰিছিল ৷

ইয়াৰ পিছতো মিত্ৰজোটৰ প্ৰতি সন্মান জনাই নীতিশ কুমাৰক প্ৰধানমন্ত্ৰী নৰেন্দ্ৰ মোডীয়ে মুখ্যমন্ত্ৰী হ’বলৈ অনুমতি দিছিল ৷ পিছে নীতিশ কুমাৰে ক্ষমতাৰ লালসাত ৰাজনৈতিক নৈতিকতা ভংগ কৰি মিত্ৰতা ভংগ কৰিছে ৷ নীতিশ কুমাৰে সকলোৰে লগত প্ৰতাৰণা কৰিছে ৷’’