ডিজিটেল ডেস্ক, ANEWS24X7: গুজৰাট নিৰ্বাচনৰ দ্বায়িত্বত থকা চিএপিএফৰ জোৱানৰ গুলীত নিহত দুই সহকৰ্মী ৷ শনিবাৰে গুজৰাটৰ পোৰবন্দৰত সংঘটিত হৈছে এই ঘটনা ৷ বিবাদত লিপ্ত হোৱাৰ ফলতে এই গুলীচালনাৰ ঘটনা সংঘটিত হয় ৷ নিহত চিএপিএফৰ জোৱান কেইজন হৈছে থইবা সিং আৰু জিতেন্দ্ৰ সিং ৷
আনহাতে এই গুলীচালনাৰ ফলত আন দুজন জোৱান গুৰুত্বৰ ভাবে আহত হৈছে ৷ আহত জোৱান কেইজনৰ এজনৰ পেটত আৰু এজনৰ ভৰিত আঘাত প্ৰাপ্ত হৈছিল।আঘাত প্ৰাপ্ত জোৱান কেইজন চৰজিৎ আৰু ৰোহিকানা ৷ সংঘৰ্ষত লিপ্ত হোৱা জোৱান কেইজন কেন্দ্ৰীয় সশস্ত্ৰ আৰক্ষী বাহিনীৰ লগতে মণিপুৰৰ সশস্ত্ৰ বাহিনী ইণ্ডিয়া ৰিজাৰ্ভ বেটেলিয়নৰ ৷ জোৱান কেইজন গুজৰাট নিৰ্বাচনৰ নিৰাপত্তাৰ দ্বায়িত্বত আছিল ৷
আঘাতপ্ৰাপ্ত জোৱান কেইজনক চিকিৎসাৰ বাবে প্ৰথমে পোৰবন্দৰ জেনেৰেল হস্পিতালত লৈ যোৱা হয় ৷ পৰবৰ্তীসময়ত উন্নত চিকিৎসাৰ বাবে জামনগৰৰ এখন চিকিৎসালত ভৰ্তি কৰোৱা হয় ৷ জোৱান কেইজনে কিয় সংঘৰ্ষত লিপ্ত হৈছিল বৰ্তমানলৈকে জানিব পৰা হোৱা নাই ৷এই সন্দৰ্ভত তদন্ত অব্যাহত ৰাখিছে আৰক্ষীয়ে ৷
উল্লেখ্য অহা ১ ডিচেম্বৰ আৰু ৫ ডিচেম্বৰত দুটা পৰ্যায়ত অনুষ্ঠিত গুজৰাট বিধানসভা নিৰ্বাচনৰ ভোটগ্ৰহণ ৷ আনহাতে অহা ৮ ডিচেম্বৰত ঘোষণা কৰা হ’ব ফলাফল ৷
