ডিজিটেল ডেস্ক, ANEWS24X7:প্ৰাক্তন ডিজিপি ভাস্কৰজ্যোতি মহন্তৰ পিতৃ বাৰ্ধক্যজনিত কাৰণত চিকিৎসাধীন হৈ আছে। কিছুদিন ধৰি ডিব্ৰুগড়স্থিত অসম মেডিকেল কলেজ হাস্পতালত ৰখাৰ পিছত সম্প্ৰতি ঘৰলৈ অনা হৈছে তেখেতৰ পিতৃক । ইপিনে সামাজিক মাধ্যমত প্ৰাক্তন ডিজিপি ভাস্কৰজ্যোতি মহন্তই তেখেতৰ পিতৃৰ অসুস্থতাৰ খবৰ জনাই লিখিছে এটা বিশেষ পোষ্ট আৰু সেই বিশেষ পোষ্টটো এনে ধৰণৰ –
” দেতিৰ গাটো বেয়া। বাৰ্ধক্যজনিত অসুস্থতা। মাজতে কিছুদিন ডিব্ৰুগড়স্থিত অসম মেডিকেল কলেজ হাস্পতালতো থাকি আহিল। বৰ্তমান আমাৰ কোঁৱৰপুৰৰ ঘৰতে চিকিৎসক গোটৰ পৰামৰ্শ তথা চিকিৎসা আৰু ঘৰুৱা যতনৰ মাজত দেতিয়ে সময় পাৰ কৰিছে। শাৰীৰিক সুস্থতাৰ সূচকাংকবোৰ ক্ৰমাৎ সন্তোষজনক হৈ আহিছে যদিও পৰম ব্ৰহ্মৰ সৈতে একাত্ম হৈ পৰাৰ, পৰমাত্মাৰ সৈতে বিলীন হৈ যোৱাৰ বাসনাই দেতিক যেন ক্ৰমাৎ অস্থিৰ কৰি তুলিছে। ওৰেটো জীৱন গুৰু দুজনাৰ একান্ত সেৱক হিচাপে ঈশ্বৰপ্ৰাপ্তিৰ সাধনা কৰা দেতি এতিয়া এনে এক স্তৰত উপনীত হৈছে, য’ত বৈষয়িক কথা-বতৰাৰ কোনো স্থান নাই, আছে কেৱল সমৰ্পিত মনোভাব।
অৱসৰৰ পিছত বেছিভাগ সময় দেতিৰ কাষতে আছো। এৰি অহা দিনৰ অলেখ স্মৃতিয়ে এইকেইদিন মনটো ভাৰাক্ৰান্ত কৰি ৰাখিছে। বাৰে বাৰে মনলৈ আহিছে- দেতিয়ে সৰুতে আমাক “দ্য আছাম ট্ৰিবিউন”ৰ হেডলাইন পঢ়িবলৈ দিয়া, বক্তৃতা দিবলৈ শিকোৱা, তৰ্ক প্ৰতিযোগিতালৈ সাজু কৰা, “গুণমালা”খন সদায় মুখস্থ মাতিবলৈ বাধ্য কৰা, খোল বজাবলৈ শিকোৱা, অভিনয় কৰিবলৈ শিকোৱা সেই দিনবোৰৰ কথা।
ভাইটি অমৰৰ সৈতে কালি নিশা দেতিৰ ওচৰত বহি খোল বজালো। দেতিয়ে তাল সংগত কৰিলে। মুহূৰ্তৰ বাবে দেতিক তাহানিৰ দেতি যেন লাগিল আৰু নিজকো সৰু কালৰ ৰণ্টু যেন অনুভৱ হ’ল। মুহূৰ্তৰ বাবে পাহৰি পেলালো দেতিৰ বয়স বৰ্তমান ৯২ বছৰ আৰু আমাৰ বয়স ৬০।
(দেতিৰ অনুশাসনৰ সুৰটো আজিও একে আছে। একে আছে দেতিৰ প্ৰতি থকা আমাৰ ভয়ো। সেয়ে নিশা খোল বজোৱাৰ পূৰ্বে দিনৰ ভাগত অনুশীলন কৰি ল’বলৈ পাহৰা নাছিলো। কিজানিবা ভুল হয়! কিজানিবা দেতিয়ে গালি পাৰে!)”
আনহাতে এই পোষ্টতোৰ লগতে এটা অন্তৰস্পৰ্শী ভিডিঅ’ প্ৰাক্তন ডিজিপি ভাস্কৰজ্যোতি মহন্তই ছেয়াৰ কৰিছে।
