ডিজিটেল ডেস্ক, ANEWS24X7: বৰপেটা জিলাৰ সৰ্থেবাৰী থানাৰ অন্তৰ্গত গৰেমাৰীত এচিড আক্ৰমণৰ ঘটনা সংঘটিত হৈছে। এগৰাকী কিশোৰীক এচিড আক্ৰমণ কৰে এটা লম্পট যুৱকে । দেওবাৰে নিশা সংঘটিত হৈছিল এই ঘটনা। ঘটনা অনুসৰি গাদেশালীপাম গাঁৱৰ এগৰাকী নবম শ্ৰেণীৰ ছাত্ৰীক এচিড আক্ৰমণ কৰে এই গৰাকী যুৱকে। প্ৰেমৰ প্ৰস্তাৱ প্ৰত্যাখ্যান কৰাৰ বাবেই এচিড আক্ৰমণৰ বলি হ’ল নৱম শ্ৰেণীত অধ্যয়নৰত কিশোৰী গৰাকী। এই অভিযোগ ভুক্তভোগী কিশোৰীগৰাকীৰ পৰিয়ালৰ লোকৰ।
কঠালভূৰি গাঁৱৰ মেহেৰ আলী নামৰ যুৱকজনে সংঘটিত কৰে এই কু-কাৰ্য। দেওবাৰে নিশা মাজদিয়া হাইস্কুল খেলপথাৰত চলি আছিল এক সাংস্কৃতিক কাৰ্যসূচী। এই কাৰ্যসূচী উপভোগ কৰি উভতি অহাৰ সময়তে লম্পট যুৱকগৰাকীয়ে গাদেশালীপাম গাঁৱৰ কিশোৰী গৰাকীক গৰেমাৰীত এচিড আক্ৰমণ কৰে।
তৎক্ষণাত পৰিয়াল আৰু স্থানীয় যুৱকে কেইগৰাকী মানে কিশোৰী গৰাকীক চেঙা খণ্ড প্ৰাথমিক স্বাস্থ্য কেন্দ্ৰত ভৰ্তি কৰে। কিশোৰীগৰাকীৰ আঘাত গুৰুতৰ হোৱাত চিকিৎসকে উন্নত চিকিৎসাৰ বাবে বৰপেটাৰ ফখৰুদ্দিন আলী আহমেদ চিকিৎসা মহাবিদ্যালয় হস্পিতালয়লৈ প্ৰেৰণ কৰে ।
কিশোৰী গৰাকীৰ ডিঙি, গাল আৰু বুকুত এচিডে আঘাত কৰে বুলি জানিব পৰা গৈছে। ইতিমধ্যেই মাজদিয়া আৰক্ষী চকীৰ ভাৰপ্ৰাপ্ত আৰক্ষী বিষয়া মৃদুল বৰাৰ তৎপৰতাত আৰক্ষীৰ জালত পৰিছে এচিড আক্ৰমণকাৰী লম্পট যুৱক মেহেৰ আলী। মেহেৰ আলীৰ বিৰুদ্ধে কিশোৰী গৰাকীৰ পৰিয়ালে মাজদিয়া আৰক্ষী চকীত গোচৰ দাখিল কৰা বুলি জানিব পৰা গৈছে ।
