শক্তিশালী হ’ব নাগালেণ্ডৰ সৈতে ব্যৱসায়িক আৰু যাতায়াত ব্যৱস্থা

ভোগদৈ ৰিভাৰ ফ্ৰন্ট আধুনিক ৰূপত নিৰ্মাণ কৰা হ’ব বুলিও আজি মুখ্যমন্ত্ৰীয়ে উল্লেখ কৰে। মুখ্যমন্ত্ৰীয়ে লগতে কয়, ‘‘যোগাযোগ আৰু যাতায়াত ব্যৱস্থাত এক নতুন মাত্ৰা প্ৰদান কৰি যোৰহাটবাসীলৈ আগবঢ়ালোঁ চিনামৰাৰ নৱনিৰ্মিত ৰে’লৱে উৰণ সেতুখনি। গুৰুত্বপূৰ্ণ উৰণ সেতুখনিয়ে দীৰ্ঘদিনীয়া যান-জঁটৰ সমস্যা বহুলাংশে দূৰ কৰাৰ লগতে ৰে’লৱে লেভেল ক্ৰছিঙত যান-বাহনসমূহে এতিয়াৰে পৰা দীঘলীয়া সময় অপেক্ষা কৰিবলগীয়া নহ’ব। বিশেষকৈ মৰিয়নি আৰু তিতাবৰৰ দৰে সম-জিলা সদৰসমূহৰ সৈতে যোৰহাটৰ যোগাযোগ অধিক দ্ৰুত আৰু সহজ হৈ পৰিব। যোৰহাট চহৰৰ প্ৰধান শিক্ষানুষ্ঠান, স্বাস্থ্যসেৱা কেন্দ্ৰ, বজাৰ আৰু অন্যান্য অত্যাৱশ্যকীয় সেৱাৰ কেন্দ্ৰসমূহলৈ জনসাধাৰণৰ যাতায়াত এতিয়াৰে পৰা বহু পৰিমাণে সুচল হ’ব। এই প্ৰকল্পই চুবুৰীয়া ৰাজ্য নাগালেণ্ডৰ সৈতেও ব্যৱসায়িক আৰু যাতায়াত ব্যৱস্থা অধিক শক্তিশালী কৰাৰ ক্ষেত্ৰত এক গুৰুত্বপূৰ্ণ ভূমিকা পালন কৰিব।’’