ডিজিটেল ডেস্ক, ANEWS24X7: আজি ইন্দোৰত অনুষ্ঠিত হ’ব শৃংখলাৰ তৃতীয়খন এদিনীয়া ভাৰত আৰু নিউজিলেণ্ডৰ খেল। মঙলবাৰে শৃংখলাৰ নিৰ্ণায়ক তৃতীয় আৰু অন্তিম এদিনীয়া খেলত নিউজিলেণ্ডৰ বিৰুদ্ধে খেলপথাৰত নামিব টিম ইণ্ডিয়াই ।
ইন্দোৰৰ হোলকাৰ ক্ৰিকেট ষ্টেডিয়ামত অনুষ্ঠিত হ’ব এই খেলখন। ৰোহিত শৰ্মাৰ নেতৃত্বত ভাৰতীয় দলটোৱে প্ৰথম এদিনীয়াত ১২ ৰানৰ জয়লাভ কৰি ছিৰিজত শক্তিশালী আৰম্ভণি কৰে।
পৰৱৰ্তী খেলখনত আঠ উইকেটৰ পতিয়ন যোগ্য জয়ৰে আয়োজক দলটোৱে জয়ৰ ধাৰা অব্যাহত ৰাখি আইচিচিৰ পুৰুষৰ এদিনীয়া দলৰ ৰেংকিঙত নিউজিলেণ্ড দ্বিতীয় স্থানলৈ পিছলি পৰে। যদি ভাৰতে টম লেথাম নেতৃত্বাধীন দলটোৰ বিৰুদ্ধে হোৱাইটৱাছ সম্পূৰ্ণ কৰিব পাৰে তেন্তে এদিনীয়া ৰেংকিঙৰ শীৰ্ষলৈ আৰোহণ কৰিব।
চলিত সপ্তাহৰ শেষৰ ফালে অনুষ্ঠিত হ’বলগীয়া টি-২০ খেলখনৰ বাবে দল পৰিচালনা সমিতিয়ে হাৰ্দিক পাণ্ডিয়াক জিৰণি দি শ্বাহবাজ আহমেদক চূড়ান্ত এদিনীয়াত জিলিকি উঠাৰ সুযোগ দিবলৈ প্ৰলোভিত হ’ব পাৰে। ইতিমধ্যে তিনিখন এদিনীয়া খেলত অংশ লৈ বংগৰ ২৮ বছৰীয়া অল ৰাউণ্ডাৰগৰাকীয়ে বলৰ সৈতে প্ৰশংসনীয় প্ৰদৰ্শন আগবঢ়াইছে। যদিও শ্বাহবাজে এতিয়াও আন্তঃৰাষ্ট্ৰীয় মঞ্চত নিজৰ বেটিং দক্ষতা প্ৰদৰ্শন কৰিব পৰা নাই, তথাপিও তেওঁ ঘৰুৱা ক্ৰিকেট আৰু আই পি এলত নিজৰ যোগ্যতা প্ৰমাণ কৰিছে।
আনহাতে হাৰ্দিকে শেহতীয়াকৈ বেটৰ সৈতে অনডাৰৱেলিং কৰি আহিছে। শ্ৰীলংকাৰ বিৰুদ্ধে তেওঁৰ মধ্যমীয়া শৃংখলা আছিল আৰু নিউজিলেণ্ডৰ বিৰুদ্ধে এতিয়াও তেওঁ কোনো প্ৰভাৱ পেলাব পৰা নাই। হোলকাৰ ক্ৰিকেট ষ্টেডিয়ামৰ খেলপথাৰখন বেটিং অনুকূল পৃষ্ঠৰ বাবে বিখ্যাত, যিয়ে বেটছমেনসকলক পুনৰবাৰ যথেষ্ট সহায় আগবঢ়াব বুলি আশা কৰা হৈছে। দ্ৰুত বলাৰসকলে মেচৰ শেষৰ অৰ্ধত কিছু সহায় পাব পাৰে, আনহাতে স্পিনাৰসকলে মিডল অভাৰৰ সময়ত বিশেষভাৱে ফলপ্ৰসূ হ’ব।
ইপিনে খেলৰ দিনটোত তাপমাত্ৰা প্ৰায় ২৯ ডিগ্ৰী চেলছিয়াছ হৈ থাকিব আৰু ২৯% আৰ্দ্ৰতা আৰু ঘণ্টাত ৮ কিলোমিটাৰ বেগত বতাহ বলিব। খেলৰ সময়ত বৰষুণৰ কোনো সম্ভাৱনা নাথাকে, যাৰ ফলত খেলুৱৈসকলৰ বাবে আদৰ্শ পৰিস্থিতি নিশ্চিত হয়।
