মৰণোত্তৰ পৰীক্ষাৰ প্ৰতিবেদন অনুসৰি, অভিনেতা নানা পাটেকৰৰ মৃত্যুৰ কাৰণ হৈছে হৃদযন্ত্ৰৰ বাওঁফালৰ প্ৰধান ক’ৰ’নেৰী ধমনীত তেজ গোট মৰা আৰু তাৰ ফলত হোৱা হাৰ্ট এটেক। এই ধমনীয়ে হৃদযন্ত্ৰৰ এটা বৃহৎ অংশলৈ তেজৰ যোগান ধৰে। দেওবাৰে গোৱাৰ মেডিকেল কলেজ এণ্ড হাস্পতালৰ (GMCH) এগৰাকী চিকিৎসকে এই তথ্য নিশ্চিত কৰে। সংবাদ সংস্থা পিটিআইৰ প্ৰতিবেদন অনুসৰি, মৰণোত্তৰ পৰীক্ষাত মৃত্যুৰ কাৰণ হিচাপে ‘এথেৰ’স্ক্লেৰ’টিক অক্লুছিভ ক’ৰ’নেৰী আৰ্টাৰী ডিজিজৰ ফলত হোৱা লেফ্ট মেইন ক’ৰ’নেৰী আৰ্টাৰী থ্ৰম্ব’ছিছৰ পৰা সৃষ্টি হোৱা একিউট মায়’কাৰ্ডিয়েল ইনফাৰ্কচন’ বুলি উল্লেখ কৰা হৈছে। অৰ্থাৎ, ধমনীৰ ভিতৰত চৰ্বি আৰু অন্যান্য পদাৰ্থ জমা হৈ সৃষ্টি হোৱা বাধাৰ ফলত তেজ গোট মাৰিছিল আৰু তাৰ ফলত হৃদযন্ত্ৰৰ পেশীলৈ তেজৰ যোগান হঠাতে বন্ধ হৈ গৈছিল। এই শাৰীৰিক অৱস্থাৰ ফলতেই তেওঁৰ স্বাভাৱিক মৃত্যু হোৱা বুলি প্ৰতিবেদনত উল্লেখ কৰা হৈছে।
৭৫ বছৰীয়া অভিনেতাগৰাকী যোৱা ৮ অক্টোবৰৰ পুৱতিনিশা গোৱাৰ পানাজিৰ সমীপৰ ডনা পাউলাত থকা নিজৰ বাসগৃহত অসুস্থ হৈ পৰিছিল। তাৰ পিছতে তেওঁক ততাতৈয়াকৈ এখন ব্যক্তিগত চিকিৎসালয়লৈ লৈ যোৱা হৈছিল। তেওঁৰ তত্ত্বাৱধায়কে এম্বুলেন্সৰ বাবে চিকিৎসালয়খনৰ সৈতে যোগাযোগ কৰাত, বাসগৃহৰ পৰা এক কিলোমিটাৰতকৈও কম দূৰত্বত থকা তেওঁৰ এপাৰ্টমেণ্টলৈ এম্বুলেন্স পঠিওৱা হৈছিল। চিকিৎসকসকলে প্ৰায় ৪৫ মিনিট ধৰি CPR প্ৰদান কৰাৰ পিছতো তেওঁক বচাব পৰা নগ’ল। পুৱা ৫ বাজি ১০ মিনিটত তেওঁক মৃত ঘোষণা কৰা হয়। এগৰাকী চিকিৎসকে প্ৰাথমিকভাৱে তেওঁ হৃদৰোগত আক্ৰান্ত হোৱা বুলি সন্দেহ প্ৰকাশ কৰিছিল। পিছত তেওঁৰ মৃতদেহ মৰণোত্তৰ পৰীক্ষাৰ বাবে GMCHলৈ লৈ যোৱা হয়।
