তফিকুৰ ৰহমান , সৰ্থেবাৰী, ৭ জুনঃ পথ সুৰক্ষাৰ সজাগতাৰ বাবে বৰপেটা জিলাৰ তাৰাবাৰী আৰক্ষী থানাই গ্ৰহণ কৰিছে এক বিশেষ পদক্ষেপ। ক্ৰিকেট খেলৰ জৰিয়তে ৰাইজৰ মাজলৈ পথ সুৰক্ষাৰ সজাগতামূলক বাৰ্তা প্ৰেৰণ কৰাৰ প্ৰয়াস কৰিছে তাৰাবাৰী আৰক্ষীয়ে। পথ সুৰক্ষাৰ সজাগতামূলক টি-১০ কাপ ক্ৰিকেট প্ৰতিযোগিতাখন আজি বহৰিৰ ডানলপ খেলপথাৰত অনুষ্ঠিত হৈ যায় ।
জিলাখনৰ অপৰাধ শাখাৰ অতিৰিক্ত আৰক্ষী অধীক্ষক সমীৰণ বৈশ্যৰ তৎপৰতাত তাৰাবাৰী আৰক্ষী থানাৰ উদ্যোগত আৰু তাৰাবাৰা থানা পৰ্যায়ৰ নাগৰিক কমিটিৰ সহযোগত অনুষ্ঠিত হয় টি-১০ কাপ ক্ৰিকেট প্ৰতিযোগিতাখন। প্ৰতিযোগিতাখনত তাৰাবাৰী আৰক্ষী থানা, তাৰাবাৰী গাঁওৰক্ষী বাহিনী, বহৰি ছিক্সাৰ্ছ আৰু মধ্য কামৰূপ মহাবিদ্যালয়ে অংশগ্ৰহণ কৰে। প্ৰতিযোগিতাখনৰ প্ৰথম পুৰস্কাৰ ট্ৰফীসহ নগদ ৭হাজাৰ টকা আৰু দ্বিতীয় পুৰস্কাৰ ট্ৰফীসহ নগদ ৫ হাজাৰ টকা। প্ৰতিখন খেলত শ্ৰেষ্ঠ খেলুৱৈসকলক একোটাকৈ হেলমেট প্ৰদান কৰা হয়। চূড়ান্ত খেলখন তাৰাবাৰী আৰক্ষী থানা আৰু মধ্য কামৰূপ মহাবিদ্যালয়ৰ মাজত অনুষ্ঠিত হয়।
চূড়ান্ত খেলখনত তাৰাবাৰী থানাই ৫০ ৰানৰ বৃহৎ ব্যৱধানত মধ্য কামৰূপ মহাবিদ্যালয়ক পৰাস্ত কৰি চেম্পিয়ন হয়। তাৰাবাৰী থানা দলৰ অধিনায়ক অপৰাধ শাখাৰ অতিৰিক্ত আৰক্ষী অধীক্ষক সমীৰণ বৈশ্যই চেম্পিয়নৰ ট্ৰফী গ্ৰহণ কৰে। শৃংখলাৰ শ্ৰেষ্ঠ খেলুৱৈৰ সন্মানত পুৰুষ আৰু মহিলাৰ বাবে এযোৰ হেলমেট লাভ কৰে তাৰাবাৰী থানা দলৰ খেলুৱৈ নুৰ ইছলাম ওৰফে মহাৰাণাই। “ছেভ ড্ৰাইভ, ছেভ লাইভ আৰু প্লে ছেভ, ষ্টে ছেভ- ৱেৰ হেলমেট” শীৰ্ষক থীমেৰে এই পথ সুৰক্ষাৰ সজাগতামূলক ক্ৰিকেট খেলখন অনুষ্ঠিত কৰা হৈছে বুলি তাৰাবাৰী থানাৰ ভাৰপ্ৰাপ্ত আৰক্ষী বিষয়া সঞ্জয় কুমাৰ ৰয়ে জানিবলৈ দিয়ে। আৰক্ষী, গাঁওৰক্ষী বাহিনী, মহাবিদ্যালয়ৰ ছাত্ৰ আৰু স্থানীয় খেলুৱৈক লৈ অনুষ্ঠিত হৈছিল প্ৰতিযোগিতাখন।
প্ৰতিযোগিতাখনৰ চূড়ান্ত খেলৰ শেষত বঁটা বিতৰণী অনুষ্ঠানত উপস্থিত থাকি পথ সুৰক্ষা সম্পৰ্কত গুৰুত্বপূৰ্ণ ভাষণ প্ৰদান কৰে তাৰাবাৰী আৰক্ষী থানা পৰ্যায়ৰ নাগৰিক কমিটিৰ সদস্য তথা অৱসৰী শিক্ষক আবুল কালাম তালুকদাৰ আৰু জিলাখনৰ অপৰাধ শাখাৰ অতিৰিক্ত আৰক্ষী অধীক্ষক সমীৰণ বৈশ্যই। তাৰাবাৰী আৰক্ষী থানা পৰ্যায়ৰ নাগৰিক কমিটিৰ অধ্যক্ষ দিলীপ বাৰ্মা , সীমান্ত শাখাৰ উপ আৰক্ষী অধীক্ষক ভাৰ্গিছ কুমাৰ ডেকা, চি অ’ ভি ডি অ’ ঋষিকেশ চৌধুৰী, শিক্ষক সমৰ দাস, চেঙা ঐক্য সন্মিলনৰ সভাপতি গৌতম পাঠক, তাৰাবাৰী থানা এলেকা গাঁওৰক্ষী বাহিনীৰ সম্পাদক জয়নাল আবদিনকে ধৰি কেইবাগৰাকীও বিশিষ্ট লোক বঁটা বিতৰণী অনুষ্ঠানত উপস্থিত থাকে।
